Biilit innaallagiatortut orsussalertakkanut sanilliullugit ikuallajannginnerupput

Biili Qinngorpumi uninngasoq januaarip qulingiluaani nalunaaqutaq tallimat qaangilaaraa ikuallappoq. Ikuallanneq piaaraluni ikinneqarnerminngaanniinngitsoq ajoquteqarnerali pissutaasoq misissuinerup takutippaa. Biilimiittoqanngilaq qatserisartullu ikuallanneq ingerlaannaq qamippaat, tamannali biilimik innaallagiatortunik ikuallattoqarnera eqqarsaatersuuteqartitsivoq.

Tamannali Kommuneqarfik Sermersuumi upalungaarsimanermut pisortap tulliata Jens Mikkelsenip ilumuunnginnerarpaa.

 – Taamaanngilarli, biililliuna innaallagissamik atortua ikuallatsitsisimavoq. Biilit orsussartortut aamma innaallagissamut atortoqarput. Kommuneqarfik Sermersuumi biilinik innaallagissamik ingerlasunik hybridinillu batteriiani ikuallattoq suli misiginikuunngilarput. Biilit ikuallattut misiginikuusagut taakkuupput orsussatortut.

Biilit innaallagiatortut hybridillu amerliartorput

Danmarkimi upalungaarsimanermut aqutsisoqarfiup novembarimi 2023-mi misissuineq saqqummiussaani atuarneqarsinnaavoq biilit innaallagiatortut plug-in-illu biilini benzinamik dieselimillu ikummatilinnik ikuallakulannginnerusut, naak inuppassuit isumaqaraluartut akerlerluinnaanik pisoqartoq.

Danmarkimi biilit innaallagiatortut hybridillu ukiut kingulliit ingerlaneranni amerleriarujussuarsimapput – 2018-imi januaarimi procentip affangajaanit 2023-mi januaarimi 8 procentinut aamma 2023-mi juulimi 9,5 procentinut. Tassa biilit innaallagiatortut hybridillu 270.000-it missaanniipput.

Biilit innaallagiatortut hybridillu amerliartortillugit ikuallalersinnaanerat aamma annertusiartorpoq. Misissuinerli naapertorlugu biilit innaallagiatortut hybridillu ikuallalertarnerat annikilleriartorpoq. 2022-mi biilit 1.150-it ikuallapput, taakkunanngalu 20-nnaat innaallagiatortuupput hybridillu. Biilit innaallagiatortut hybridillu biilit ikuallattut amerlassusaannut sanilliukkaanni siorna biilit innaallagiatortut hybridillu 10.000-iuppata 1,1-it ikuallapput, 2021-mi 1,5-iusut. Biilit benzinamik dieselimillu ikummatissallit 2022-mi biilit 10.000-iuppata 3,8-it ikuallassimapput. 

Batterii ikuallattoq

Biilili innaallagiatortut hybridillu ikuallalersinnaanerat eqqumaffiginissaat tunngavissaqarluarpoq. Biilimi lithium-batterii ikuallalerpat qaminnissaa ajornakusoorsinnaavoq. Taamaattumik Upalungaarsimanermut Aqutsisoqarfiup biilit innaallagiatortut hybridillu ikuallalersinnaasut nakkutigiuarpai maannamulli paasissutissat pigineqartut takutippaat biilit innaallagiatortut hybridillu benzinamik dieselimillu orsertakkanut sanilliullugit ikuallajannginnerusut.

– Batteri ikuallalerpat qaminnissaa ajornakusoortarpoq. Ikuallattoq sakkortusissagaluarpat iliuusissanik arlalinnik Danmarkimi suliaqartoqarsimavoq. Batterii ikuallattoq qaminniarlugu nutaanerusunik iliuusissanik aamma peqarpoq. Biilinilli orsussartortunit ikuallattunit qamisaasarneq allaaneruvoq. Ajornakusoorneruvoq sivisunerusumillu pisinnaalluni, upalungaarsimasulli qanoq iliornissartik ilisimavaat. Aamma Kalaallit Nunaanni, Upalungaarsimanermi aqutsisoqarfiup allaffiani pisortaq Frederik Prytz-Grønfeldt Motoorimut oqarpoq. – Biilit pisoqaanerusut biilini nutaanerusunit ikuallakulanerupput, biilit innaallagiatortut nutaaliaanerusumik sanaajugamik ikuallakulannginnerupput. Ukiut qulit qaangiuppata qanoq pisoqassanersoq soorunami naluarput, taamaattumik tamanna malinnaaffigilluartarparput.

Immiissutit akuerisat atukkit

Biilinik batteriitortunik hybridinillu pillit nammineq iliuuseqarsinnaapput. Assersuutigalugu biilit immiisinnerata eqqortumik pinissaa qulakkeerlugu, biilillu mianersoqqussummik assigisaanillu ersersitsippat qisuariarfigalugu.

- Biilimik immiinermi atortorissaarutit ajoquteqannginnerat biilillu innaallagiatortut pisariaqartitaannik innaallagissamik immiilluarsinnaanersut qulakkeernissaat. Biilip arlaatigut aaqqeeqqusilluni iliuuseqaqqusineri soorunami aamma qisuariarfiginissaat. - Biililli orsussartortut biilinut innaallagiatortunut sanilliullugit sisamariaammik ikuallassinnaanerat ilimanaateqarneruvoq, Frederik Prytz-Grønfeldt oqarpoq. Nuummi periaaseq paasiuminartoq

Nuummi upalungaarsimasoqarfimmut uterutta biilinik ilaatigut innaallagissamik hybridimillu ikuallattoqartillugu qanoq iliortoqarsinnaanera pillugu paasissutissaqarpoq. – Aallaqqaammut inunnik/uumasunik biilinittoqarpat anisinniaqqaartarpavut,. Programmi ”Crash Recovery System” atortarparput, taanna biilitsinni upalungaarsimasuniittumi tabletsimiippoq. Tassani biilinik/bussinik/motorcykelinik/scooterinik il.il. tamakkiisumik ilaannakuusumilluunniit innaallagiatortunik qanoq sanaajunerinik takussutissaqarpoq. Taanna atorlugu takusinnaasarparput biili sukkut kipissanerlugu ulorianarsinnaasunik kalluaanaveersaarluta annissiniassagutta. Biili innaallagiatortoq hybridiluunniit ajutoorpata batteriip qanoq kissartiginera mianersuutigisariaqarparput: 

– Biili sorleq pineqarnersoq qulakkeertariaqarparput batterip sumiinnera paasiniarlugu. Batteri biilip iluani, ataanni imaluunniit tunuaniippa? Batteri kissappallaannginnissaa nakkutigiinnavittarparput, batterimi kissappallaaruni biilit sinnera sunnerlugu siaruaateriasaarsinnaammat. Atortorissaaruteqarpugut biilip sortaa kissarnersoq takusinnaallutigu, taassuma paasissutissiissutigisarpaa ulorianartoqarnersoq imaluunniit ulorianartoqaleriasaarsinnaanersoq. Aamma atortunik assigiinngitsunik atorsinnaasatsinnik peqarpugut, soorlu sakkut nillertuusut, gumminik allequttat aaqqatit immikkut ittut innaallagissamik attuinissamut illersuutillit. Aamma biilip ataanni batterii nuisappata serpartaatinik peqarpugut nillersaatissanik, Jens Mikkelsen oqaluttuarpoq, taannalu upalungaarsimanermut pisortat allat peqatigalugit biilinut batteriitortunut hybridinillu ikuallattunut qamisaanissamut ulluni pingasuni pikkorissaqqammerpoq.