Atorfillit Kattuffiat eqqissisaasoq: Suli isumaqatiginninniartoqarpoq

Inunnik isumaginninnermi suliallit pingasunngorpat illoqarfinni aqqusinermi takussaassapput. Qaammammut aningaasarsiani tapiissummik annaasaqarnissartik naammaginagu akerliussutsimik takutitsinermi takutinniarpaat.

Atorfillit Kattuffiat inunnik isumaginninnermi suliallit aningaasarsiaat pillugit isumaqatiginninniaqataavoq, taakku erseqqissaatigaat akissarsiat appartinnissaanut sulissuteqaratik.

- Ajornerusumik inissittoqarnissaa siunertarineqanngilluinnarparput. Aamma taamaanngisaannarpugut, soorunami taamatut isumaqatiginninniartoqarneq ajorpoq.

Uaguunngilaq - Naalakkersuisunuku

Isumaqatiginninniarnerit oqartussaasut Atorfillit Kattuffiatalu suliaraat. Myndigshedstillægillu peerneqarnissaa Atorfillit Kattuffianiit siunnersuutigineqarani Naalakkersuisuniit siunnersuutigineqartoq siulittaasup naqissuserpaa.

- Taanna Naalakkersuisut siunnersuutigivaat. Uaguunngilaq. Uagut tusarniaaginnarpugut, peerusunneqanngippat soorunami peerneqarnavianngilaq, AK-mi siulittaasoq Dina Olsen eqqissisaavoq.

NIISIP myndighedstillægip peerniarneqarnera, kiisalu rådighedstillæginik taarserneqarniarnera, tassanilu qaangiuttoornermi sulisussaatitaaneq qaammatini pingasuni 52 time tikillugu piumasaqaataanera akerleraat.

Aqqaluaq B. Egede: Isumaginninnermut ilinniarnissaq kajungernarnerulertariaqarpoq

Akerliussutsimik takutitsiniarneq uggornarpoq

Isumaqatiginninniarnermut attuumassuteqartut akissarsiat sulisullu atugaat pillugit isumaqatiginninnialeruttorput, marsillu 21-ani ataatsimeeqqittussaallutik. Isumaqatiginninniartut NIISIP ataatsimeeqataanissaa kissaatigaat. Taamaattumik Dina Olsen isumaqarpoq akerliussutsimik takutitsinissaq uggornartoq:

- Uggornalaarpoq isumaqatiginninniarnerit suli ingerlasut, suliluunniit aalajangertoqanngitsoq tassunga killittoqarmat.

Atorfillit Kattuffiata siulittaasuata neriuutigaa isumaqatiginninniarnerit maajimi naammassisasut.