Akileraartarnikkut aaqqissuusseqqinneq:
Aningaasat hundrede millionit arlallit innuttaasunut apuunniarneqarput
Inatsisartut upernaakkut ataatsimiinnissaat qimerloorlugu, isumaliornarsinnaavoq innuttaasut aningaasaqarnikkut najummatsisimanartorsiortut ikiorneqarnissaat tunulliunneqarsimasoq. Sermitsiamilli paasiniaavugut akileraartarnermut aaqqissuusseqqinnissaq sumut killinnersoq. Suliap ingerlanneqarneranut qanimut ilisimasallit tunngavigalugit aningaasarpassuit innuttaasunut iluaqutissiissutiginiarneqarput.
Annonse
Inatsisartut 2024-mi upernaakkut ataatsimiinnnissaanni oqaluuserisassat qimerloorlugit Naalakkersuisut tungaanniit akileraartarnikkut politikkikkut iliuusissat takussaanngillat. Tamanna pivoq naalakkersuisooqatigiit illuatungiliuttullu sinniisaat akileraartarnermut iluarsaaqqinnermut isumaqatigiinniarnernik ingerlataqaraluartut, siunertarineqarluni innuttaasut aningaasaqarnikkut patajaallisaaffigineqarnissaat, innuttaasummi ilarpassui piffissami matumani sakkortuumik aningaasarliornermik misigisaqarput nunarsuarmi ajornartorsiutit annertuut, ilaatigut sorsunnernik silaannaallu allanngoriartorneranik pissutilimmik.
Sermitsiaq paasiniaavoq sooq naalakkersuinikkut iliuusissanik saqqummiussisoqannginnersoq, taamaaliornikkummi innuttaasut ulluinnarni inuunerannik ajornannginnerulersitsiniarnermut tunngasut isumannaarniarneqarsinnaammata.
Paasivarput suli isumaqatigiinniarnernik Inatsisartut partiivisa Naalakkersuisullu akornanni ingerlatsisoqarnera pissutaasoq, Naleraq isumaqatigiinniarnernit tunuarnikuusoq eqqaassanngikkaanni suli isumaqatigiinniartoqarami.
Aningaasat hundrede millionit arlallit innuttaasunut agguaanniarneqarput
Sermitsiaq tusarfinnit tutsuiginartunit suliap ingerlanneqarneranik ilisimannilluartunit paasitinneqarpoq annertuumik innuttaasunut malunnaateqartussanik siunertaqarluni isumaqatigiinniartoqartoq, siunertarineqartorlu 300 millionit koruunit sinnerlugit akileraartarnermut aaqqissuusseqqinneq aqqutigalugu innuttaasunut piffissami aggersumi apuunneqassasut.
Ilisimatinneqarnerput naapertorlugu inummut ilanngaatip qaffanneqarneratigut aammalu sulinermut ilanngaatip ilanngullugu qaffanneqarneratigut innuttaasut aningaasaqarnerulernissaat pingaarnerusumik aqqutissiuunniarneqarpoq, akileraarutip ataatsimoortumik apparneqarnissaa pineqarani, pissutissaqarporlu ilimagissallugu innuttaasut isertitakinnerpaat akunnattumillu isertitallit annerpaamik iluaqutissinniarneqarnissaat.
Akitsuusersueriaaseq ilanngullugu sukumiisumik misissuiffigineqarpoq
Inummut ilanngaatip aammalu sulinermut ilanngaatip qaffanneqarnerisa saniatigut aamma akitsuusersuerisaaseq - amerlasuunut pisarioqisoq - qimerloorneqartut ilagaat .
Naalakkersuisut sukkulluunniit siunneersuuteqarsinnaasarpput akitsuutit nikisinneqassasut, taamaalilluni akitsuusersuinermik ilusilersuisimaneq misissuiffigeqqissaarneqarnerata inernissaa utaqqeqqaanngikkaluarlugu upernaakkut ataatsimiinnermi allannguinissamik siunnersuuteqarsinnaapput, partiit isumaqatigiinniartut isumaqatigiissutigisimassappassuk tassuuna aamma oqilisaasoqassasoq
Akitsuusersuinermik aaqqissuussinermut tunngatillugu, Demokraatineersoq Nivi Olsen siunnersuuteqarpoq Inatsisartut inatsisaannik eqqussuussinermut akitsuutinik allannguissasut, taamaalilluni eqqussuussinermut akitsuut tipigissaatinut, pinnersaatinut aammalu perusuersartarfinni atortunut tunngassuteqartut (akitsuusersuutitut immikkoortoq 090) peerneqassasut.
Ilisimaneqareersutut Inuit Ataqatigiit, Siumut, Demokraatit aamma Atassut akileraartarnermut aaqqissuusseqqinnissamut tunngatillugu isumaqatigiinniuteqarput, taamaattumik Nivi Olsenip siunnersuutaa akitsuusersuinermut tunngasutigut isumaqatigiinniarnernut naapertuussimasinnaavoq.
Tusarfigut tutsuiginartut naapertorlugit siuliani taaneqartut saniatigut aamma imeruersaatit kulsyrillit (sodavandit) qummoroortartullu akitsuutaat allanngortinneqarsinnaasunut ilaasinnaapput. Taamaattorli eqqaamassavarput isumaqatigiinniarnerit suli ingerlammata.
Sermitsiap tusarfii tutsuiginartut malillugit aamma sulissutigineqarpoq akileraartarnermut akitsuusersuinermullu inatsisit paasiuminarnerulersinnissaat.
