UJAJAANEQ TOQUTSERIARNERLU
Angutit marluk ulluni 28-ni tigummigallarneqartut
Angutit marluk marlunngornermi marsip 19-iani Sermersuup Eqqartuussiviani sassartinneqarput, taakkulu ulluni 28-ni tigummigallarneqassasut eqqartuussiviup aalajangerpaa.
Ataasinngornermi unnukkut toqutseriaraluartoqarneranik, inuup savimmik kapineqarneranik, suliaq Kalaallit Nunaanni Politiit misissorpaat.
Angutit marluk 23-nik 42-nillu ukiullit ataasinngornerup unnuaani politiinit tigusarineqarput. Angutit taakku marluk marlunngornermi marsip 19-ani eqqartuussivimmut sassartinneqarsimasut, Kalaallit Nunaanni Politiit tusagassiuutinut nalunaarummi ilisimatitsipput. angutit taakku ulluni 28-ni tigummigallarneqassasut Eqqartuussiviup aalajangerpaa.
Eqqartuussineq matoqqasumik ingerlanneqarpoq, pisorlu pillugu politiit suli misissuigamik sukumiinerusumik oqaaseqarsinnaanngillat.
Ujajaasuusutut toqutseriartutullu unnerluutigineqarput
- Taakku ujajaasutut toqutseriartutullu unnerluutigineqarput. Nuummi Kongevejimi Brugseneeqqamut iseramik immiaaqqanik karsinik marlunnik tillissimapput, pisiniarfimmilu sulisunut immiaaqqanik naloriussillutik, tamatumalu kinguninngua Nuummi sumiiffimmi allami inuk naavatigut savimmik kapivaat, politiit tusagassiuutinut nalunaarummi allapput.
Politiit marlunngormat unnukkut pasisap pingajuat, aamma ujajaasutut toqutseriarsimasutullu unnerluutigineqartoq, angutaasimasoq 21-nik ukiulik, nassaarisimavaat.
Pingasunngormat ullaap tungaani angut 21-nik ukiulik ujajaanermit toqutseriarnermillu pisuusutut politiinut imminut tunniuppoq. Angut aamma ujajaanermit toqutseriarnermillu pisuusutut unnerluutigineqartoq, Kalaallit Nunaanni Politiit ilisimatitsipput.
Pasineqartut kingulliit marluk pingasunngornerup ingerlanerani Sermersuup Eqqartuussiviani killisiorneqassapput.