Akileraartarnermut isumaqatigiissummi ilanngaatit 360 millionit koruuninut qaffanneqarput

Partiit naalakkersuisoqatigiit Inuit Ataqatigiit Siumullu aamma Naalakkersuisut, akileraarutinik aaqqissuusseqqinneq pillugu isumaqatigiissut tallimanngormat ullaap tungaani saqqummiuppaat.

Isumaqatigiissut 360 millionit koruuninik naleqartoq, nalunaarusiami tusagassiuutinut tunniunneqartumi allassimavoq.

Ilanngaatit 48.000 koruuninit 60.000 koruuninut qaffanneqarnissaat isumaqatigiissummi pingaarnerit ilagaat. Ilanngaat ukiorpassuarni nalimmassarneqarnikuunngilaq.

Aammattaaq suliffeqarnermut ilanngaat qaffanneqassaaq, taamaalilluni nunatta karsianut aningaasartuutit ukiumut 89 millionit koruuninit 261 millionit koruuninut qaffanneqassapput.

- Naligiinnginnermik annikillisaaniartut

Suliffeqarnermulli ilanngaat 500.000 koruunit sinnerlugit isertitaqartunut atorunnaarsinneqassaaq:

- Annikitsumik akunnattumillu isertitallit pitsaanerusumik atugaqartinniarlugit, suliffeqarnermut ilanngaat isumaqatigiissuteqartut ima aaqqissussavaat, akiliutaasut qaffaannarnagit, aammali ullumimut sanilliullugu siusinnerusukkut atorunnaarsillugu. 

- Allannguut naligiinnginnermik annikillisaassaaq inuppaalunnillu suliumanerulersitsissalluni, Naalakkersuisut najoqqutassaanni allassimavoq.

Isertitanut agguataakkanut aaqqissuusseqqinnerup sunniutai skemami ataani takuneqarsinnaapput. 200.000 koruunit 249.999 koruunillu akornanni isertitallit aaqqissuusseqqinnermik malugusunnerpaassasut tassani takuneqarsinnaavoq, inuit taakkunani eqimattaniittut qaammammut 1.300 koruunit sinnilaarlugit aningaasaateqarnerusalissallutik - ukiumut 16.000 koruuningajannik.

Aningaasat akitsuutinik appaassutigineqartussat 15 millionit koruunit aaqqissuusseqqinnermi ilaapput.

Aningaasat ima pissarsiarineqassapput- ilanngaat atorunnaarsinneqassaaq

2020-nut kisitsisinngorlugu Nunatta Karsiata ataatsimut annaasassai kisitsisinngorlugit 360 millionit koruuniupput.

Ernianut aamma utoqqalinersiaqarnissamut aaqqissuussanut akilersuinernut ilanngaassisinnaaneq atuutiinnassasoq, isumaqatigiissuteqartut isumaqatigiissutigaat. Ilanngaatit sinneruttut atorunnaarsinneqassapput.

Aningaasaliineq eqqarsaatigalugu aningaasarpassuit (187 millionit koruunit) pisortani aaqqissuusseqqinnikkut pitsanngorsaanikkullu pissarsiarineqassapput. Tamassuma saniatigut aningaasaliinermut suliniutit uku taaneqarput:

· Suliffeqarnermi akitsuut 1 procentimik qaffasinnerusoq (106 millionit koruunit)

· Ilanngaatit ataasiakkaat atorunnaarsinneqarnerat (14 millionit koruunit)

· Aningaasalersugassap sinnera 53 millionit koruunit