QEQQATA KOMMUNIA
Aasaanerani innarluutilinnut naleqquttumik isaarialiortoqassaaq
Sisimiut timersortarfeeraani nerrivimmi arsaarartoq nerrivimmi arsaararialeraangami ujaqqanit angisuunit aqqutaani akornuserneqartarsimavoq. Ilaasa kissumiarlugu eqquttariaqartarsimavaat.
Nerrivimmi arsaarartartoq innarluutilik Nuka Oline, Sisimiut timersortarfeeraanut ajornaatsumik isersinnaarusuppoq. Ujararujussuit pillugit timersortarfeeraq nammineerluni iserfigisinnaanngilaa.
Maanna iserfigiuminarsinissaa neriuuteqarnarsivoq. Aasamut innarluutilinnut naleqqussagaanerusumik isaarialiortoqarnissaa, Qeqqata Kommuniata neriuutigaa.
Maanna iserfigiuminarsinissaa neriuuteqarnarsivoq. Aasaanerani isaariaq innarluutilinnut naleqqussarnissaa periarfissaalerumaartoq, Qeqqata Kommuniata neriuutigaa.
- Aputaaruppat sanaartornerlu aallartissinnaalerpat aasaru iluarsaassineq naammassisinnaassallugu neriuutigaarput, Qeqqata Kommunianiit Sermitsiamut ilisimatitsissutigineqarpoq.
Kinguaattoorneq nassuiaatigineqartoq
Sisimiuni timersortarfeeqqami sapaatip-akunneranut arlaleriarluni nerrivimmi arsaarartarfimmini innarluutilinnut naleqquttumik isaariaqalernissaa, Nuka-Olinep aqqaneq-marlunnik ukiullip sivisuumik utaqqisimavaa.
Ajoraluartumik innarluutilinnut naleqqussagaq isaariaq ujaqqanit angisoorsuarnit asserneqarsimavoq, taamaattumillu nammineq timersortarfimmut iserniarnermini ajornartorsiuteqarpoq.
Kommunip, taassuma pisariaqartitaanik isumaginninnissamik akisussaaffillip, sooq taama sivisutigisumik utaqqisimanera nassuiaatissaqartippaa.
- Timersortarfeeraq 1991-imi sananeqarmat isaariaq innarluutilinnut naleqqussarneqarsimanngilaq. Taamani sanaartornerit tamarmik innarluutilinnut naleqqussarneqarsimanngillat. 2023-mi sanaartornerup innarluutilinnut naleqqussarnissaanut aningaasanik immikkoortitsisoqarpoq, maannalu suliaq aallartippoq. Nunap maniilanera pissutigalugu isaarissamullu piumasaqaatit naammassinineqassappata, ujaqqanik sananeqartussaavoq. 2023-mi aasakkut ujaqqat atorneqartussat pissarsiarineqarsinnaasimanngillat.