SORAARNERUSSUTSISIAQALERNISSAMUT AAQQISSUUSSINERMUT PEQATAASUSSAATITAANEQ
Aaqqissuussineq saqitsaassutaaqisoq pillugu nalunaarusiaq takkutilerpoq
Nuna tamakkerlugu innuttaasut soraarnerussutisiaqalernissamut piareersarneruariaqarput. Tamanna tunngavigalugu Inatsisartut aamma Naalakkersuisut 2018-mi pisussaaffiliisumik soraarnerussutisiassanut aaqqissuussinermik atuutilersitsinerannik kinguneqarpoq. Maanna ukiut arfinillit missaasa qaangiunneranni Naalakkersuisut aaqqissuussineq pillugu nassuiaammik saqqummiussissamaalerput.
Naalakkersuisut sapaatip akunnerata siuliata naalernerani akileraartarnikkut aaqqissuusseqqinnissaq pillugu saqqummiussipput, aaqqissuusseqqinneq taanna 360 millioner koruuninik naleqarpoq.
Aningaasat taakku amerlanerit inummut ilanngaammik aammalu suliffeqarnermi ilanngaatinik qaffaanikkut, pingaartumik akissarsiatigut appasinnerusuniittunut akunnattumillu isertitalinnut iluaqutissiissutiginiarneqarput.
Taamaattorli soraarnerussutisiaqalernissamut katersisitaasut naammattumik ileqqaarisimanngitsut sukkanerusumik pisussaaffimminnut naammassinninniarnissaannut pitsanngoriaataasut atorneqassanersut, innuttaasut namminneq misigissajunnarsissavaat, inummut ilanngaat sulinermilu ilanngaat qaffanneqarpata.
Aaqqissuussaaneq pillugu nalunaarusiaq saqqummiliivippoq
Soraarnerussutisiaqalernissamut pisussaaffigalugu katersisitaaneq eqqunniarneqaqqaalermat Inatsisartuni partiit naammagisimaarinnerrapput, taamani 2016-imi ukiaanerani ataatsimiinnermi siunnersuut oqaluuserineqarmat. Taamanilu partiit tamarmik isumaqatigiipput, aaqqissuussinissaq isumassarsiatsialaanerarlugu.
Kisianni ataaseq tassaavoq politikkikkut siunnersuutit pitsaasut, aappaalu tassaavoq innuttaasunut kingunerisassat. Tamanna pissutigalugu, ingammik illuatungiliuttut isummaminnik mumisitsipput, maannalu tamakkiisumik akerliullutik aaqqissuussaanermut namminneq aallartitseqataaffigisaminnut.
Maannalu naalakkersuisooqatigiit partiivi sinnerlugit ilaasortat ilaanni aaqqissuussaanermut tunngatillugu naammagittaalliuutit malugineqarsinnaapput.
Inatsisartuni ilaasortaq, Doris J. Jensen (S) Inatsisartut upernaakkut ataatsimiinneranni 2023-mi siunnersuuteqarpoq aaqqissuussaaneq pineqartoq nalilersuiffigineqassaoq, siunnersuutaalu allanngortinneqalaaraluarluni iluatsippoq. (UPA&UKA 2023/117)
Maanna Inatsisartunut nalunaarusiaq saqqummiunneqassaaq aamma nalunaarusiami aningaasaqarnermut akileraartarnermullu Naalakkersuisup aaqqissuussaanermut tamarmiusumut nalilersuineq saqqummiutissavaa. Nalunaarusiaq Inatsisartunut agguaanneqassaaq upernaaq manna ataatsimiittoqarnerani.
Naalakkersuisut neriorsuutigaat aningaasat innuttaasunut iluaqutissiissutiginiarneqartut mangiarneqassanngitsut
Sermitsiap nittartakkatigut nutaarsiassaqartitsivianit Naalakkersuisunut apeqqutigaarput akileraartarneq pillugu aaqqissuusseqqinnerup saqqummiunneqarnerani tallimanngornermi marsip 22-ani, innuttaasut soraarnerussutisiaqalernissaminnut katersisitaanerminnik kinguaattooruteqarsimagaangamik akileraarutitigut aallerfigineqartarmata ilumut aaqqissuusseqqinnermiit ilimasaarutigineqartut pitsanngorsaataasut misigissaneraat.
Akileraartarnermut aningaasaqarnermullu Naalakkersuisoq, Erik Jensen (S) aamma Naalakkersuisut siulittaasuat, Múte Bourup Egede (IA) isumaqatigiillutik akissuteqarput, qulakkeerniarneqassasoq innuttaasut aningaasaqarnikkut oqilisaaffigineqarnissaat mangiarneqarani iluaqutissiissutiginiarneqassasoq.