Angerlarsimaffeqanngitsunut inissiat pillugit isornartorsiuisoqareersoq kommuni akissuteqarpoq
Aaqqissuussaaneq nutaaq ammasumik eqqarsaatigilluarsiuk!
Blok 7-imi 8-milu najugallit najugaqarfimminni angerlarsimaffeqanngitsut kissaatiginngilaat, taamaattumik blok 8-mi angerlarsimaffeqanngitsunut inissialiorsimaneq akerliuffigalugu atsiornernik katersipput. Atsiortuni 75%-ii atsiorput.
Kommuneqarfik Sermersuup isornartorsiuinerat paasinerarpaa:
- Siullermik, angerlarsimaffeqanngitsunut 15-i tikillugit amerlassusilinnut blok 8-mi najugaqarnissamut sungiusaammik pilersitsinermut atatillugu ernumassuteqarnerit paasilluarsinnaavagut, Kommuneqarfik Sermersuumi Myndighedschefi akissummini René Kvist allappoq.
Angerlarsimaffeqanngitsut tapersersuinnarpagut
Taanna nassuiaavoq angerlarsimaffeqanngitsut piffissami sivisuumi aalajangersimasumik najugaqarnissaannut neqeroorfiginerisigut eqqissisimalersinnissaat First Housingip siunertaasoq.
- Angerlarsimaffimmik pilersitsinitsinni anguniagaraarput angerlarsimaffeqanngitsut inuunerminni patajaatsumik nammineersinnaalernissaanullu ikiornissaat.
Saniliusoq atsiornernik katersisoq isumaqarpoq najugaqarfimmi ilaqutareeqarfiusumi, inuusuttoqarfiusumi utoqqaqarfiusumilu angerlarsimaffeqanngitsut najugaqartinissaat toqqissisimananngitsoq.
Kommuneqarfik Sermersooq nassuiaavoq taakkua angerlarsimaffeqanngitsut innuttaasuusut pimoorussisut.
- Innuttaasuupput inuunerminni pitsanngorsaanissaminnut, aningaasatigut tunniusseqataanissaminnut inuiaqatigiinnilu akuunissaminnut tunniussimasuusut.
Ammasumik eqqarsartariaaseqaritsi
Kommuneqarfik Sermersuup saniliusut ammasumik eqqarsartariaaseqarnissaannik kajumissaarivoq, angerlarsimaffeqanngitsummi patajaatsumik inuuneqalernissaminnut sulissuteqarmata.
- Najugaqartut kajumissaarusuppagut ammasumik eqqarsarsinnaaqqullugit, inuillu ataasiakkaat inuunerminni pitsanngorsaarusunnerannut periarfissaqarnissaannut tapersersueqqulugit.
- Qularutiginngilarput najugaqarnissamut neqeroorut angerlarsimaffeqanngitsunut inuiaqatigiinnullu ataatsimut pitsaasumik kinguneqarumaartoq.
Kommuneqarfik Sermersuumi immikkoortortaqarfik innuttaasunik ataatsimiisitsinissamut suliaqarpoq. Tamanna pissaaq sisamanngornermi marsip ulluisa 21-anni, nalunaaqutaq unnukkut arfineq-marlunut. Tassani suliniut pillugu ataatsimiisitsisoqassalluni.