SIK-MI SIULITTAASOQ
Aaqqiissut pitsaanerpaaqanngilaq - kisianni pisissutissat amerlanerulissapput
Sulinermik Inuussutissarsiuteqartut Kattuffianni siulittaasoq Jess G. Berthelsen, suliffissanik pilersitsinikkut akileraarutitigut aqqiissuusseqqinnerup aningaasalersorneqartariaqarnerarpaa "aningaasat kaasarfimmiit kaasarfimmut nuussineq" pinnagu.
Aningaasarsiornikkut isertitakinnerpaat aamma SIK malillugu akissarsiallit 28.000-t missaanniittut, taakkuupput akileraartarnermut aaqqissuusseqqinneq aqqutigalugu aningaasaqarnerulerneq misigissavaat.
Taamaattorli SIK-mi siulittaasoq, Jess G. Berthelsen, akileraartarnermut aaqqissuusseqqinnermik naammaginninngilaq. Taamaalilluni ilaasortani aningaasaqarnikkut periarfissarissaarnerulernissaannut qisuariarnini ima oqaaseqartalerpaa:
- Tunngaviusumik pitsaasuuvoq ilaasortagut maanna aningaasaqarnikkut periarfissarissaarnerulernissaannut aqqutissiuussisoqarmat, kisianni qanoq annertutigisumik taakkua iluaqutigisinnaanerat takusinnaanngilara, tassami takusinnaavara ilaasortagut assersuutigalugu sodavandit qillertuusat amerlasuut imertariaqarpaat aaqqissuusseqqinneq matussuseeqataaffigissagunikku, Jess G. Berthelsen oqarpoq nangillunilu:
- Aningaasarpassuit matumani pineqartut nutaamik pilersitsinikkut aaneqartussaanngillat, kisianni kaasarfimmiit kaasarfimmut nuunneqartussaapput, tassami missingersuutigut taamaaginnarput, nunattalu karsianut aningaasanik nutaanik isertitaqartussaanngilagut. Taamaammat qisuariaatiga siulleq tassaavoq, tamanna pitsaanerpaamik aaqqiissutaanngitsoq, Jess G. Berthelsen Sermitsiap nittartakkatigut nutaarsiassaqartitsivianut oqarpoq.
Kajumissaarivoq aqqutit allat atorlugit aningaasalersuinissaq pissasoq
Jess G. Berthelsen isumaqarpoq, nunami innuttaasut aningaasaqarnikkut periarfissarissaarnerulernissaat anguneqassappat, taava nutaanik isertitaqarfiusunik aallarniisoqartariaqartoq, aningaasat maannakkut pigineqartut agguateqqinneqarnerat aqqutiginagu:
- Kaammattuutigissavara aningaasalersuinissaq suliffissanik nutaanik pilersitsinikkut siunnerfigineqassasoq, tamannalu pisinnaavoq aatsitassarsiornerup nukittorsarneqarneratigut aammalu pisuussutinik atuinermi akitsuutitigut isertitsiniartoqassasoq, taamaalilluni nutaanik isertitaqartoqarsinnaammat, taamaalilluni ilaasortagut sodavandinik qillertuusanik puulinnik imernissaat tunulliullugu suliffissaqartinnissaat qulakkeerneqarsinnaammat, SIK-mi siulittaasoq oqarpoq.