Issittumi Inatsisartut
Aaja Chemnitz pingajussaa Issittumi Inatsisartut siulittaasuattut qinerneqartoq
Folketingimi ilaasortaq Aaja Chemnitz (IA) Issittumi inatsisartut komiteanni siulittaasutut tamarmiusunit qinerneqaqqippoq.
IA-p Folketingimi ilaasortaatitaa Aaja Chemnitz Issittumi inatsisartut komiteanni siulittaasutut tamarmiusunit qinerneqaqqippoq.
Aaja Issittumi inatsisartut suleqatigiinneranni 2021-mili siuttuusimavoq, USA-mi senatori Alaskameersoq Lisa Murkowski komitemi siulittaasup tulliatut qinerneqaqqittoq peqatigalugu.
- Issittumiittugut sammivinnit arlalinnit tatisimaneqarnerujartorpugut. Illuata tungaani aningaasaqarnikkut qaangerniagassat amerliartuinnarput inuuniarnikkullu atukkat ajornarsiartorlutik. Illuanilu sakkutooqarnikkut nalorninartorsiorneq isummerfigisariaqagarput annertusiartorpoq. Ataatsimut isigalugu Issittumi sorsuutissaqaqaagut suleqatigiinnissarlu qilanaarivara, Aaja Chemnitz oqarpoq.
Pineqartilluta ilaassaagut
Naalakkersuisut 2024-miit 2033-mut Nunatta Nunanut Allanut, Sillimaniarnermut Illersornissamullu Politikissaanut Periusissiaanni: ”Nunarput nunarsuarmi: Pineqartilluta ilaassaagut” Issittumi inatsissartunut namminerisamik ilaasortatitaqarnissamik kissaateqarput, tamannalu Aajap tapersersorpaa:
- Kalaallit Nunaata komitemi namminerisamik ilaasortaatitaqalernissaa kissaatigaara. Kunngeqarfimmi kisiartaalluta Issittumi nunaqarpugut Issittumilu ineriartornermut sunniutilinnik aalajangiinernut toqqaannartumik sunniuteqartariaqarluta. Kalaallit Nunaata Issittumi inatsisartuni namminerisamik ilaasortaatitaqalernissaanut pisortatigoortumik noqqaassuteqarnissaa taamaammat piumasaraara, Aaja Chemnitz naggasiilluni oqarpoq.
Issittumi Inatsisartuni ilaasortat nunanit assigiinngitsuneersuupput. Issittumut tassanilu innuttaasunut tunngasunik sammisaqartarput politikkikkut, avatangiisitigut inuttullu aningaasarsiornikkullu unammilligassat Issittumut sunniuteqartut aaqqinniarlugit suleqatigiittarlutik.
