21-nik ukiullip inunnik 14-inik toqutseriarsimanini nassuerutigaa

Angut 21-nik ukiulik eqqissisimallunilu tatitooq politiinit tallimanit Aarhusimi eqqartuussivimmut sassartinneqarpoq. Ilaatigut inunnik 14-inik toqutseriarsimasutut unnerluutigineqarnera unnerluutigineqartut 28-usut ilagaat, aamma tillinniarsimasutut, nakuusersimasutut, sioorasaarisimasutut, aserorterisimasutut ikuallatsitsisimasutullu unnerluutigineqarmat.

Unnerluutigineqartoq qorsummik teqqisserluni illersuisumi Christina Johnsenip saniani issiavoq, tassanilu Kalaallit Nunaanni Politiini unnerluussisussaatitaasoq Martin Strandby Nielsen unnerluussutinik atuffassivoq.

Unnerluutiginnissutit 28-t atuffassissutigineqarmata 21-nik ukiullip unnerluutiginnissutinit ataasiinnaq ilaannakuusumik nassuerutiginniffigaa, tassa aallaammik tillissimanini, unnerluussisussaatitaasorlu naapertorlugu aalisariummit umiarsualivimmeersumit taanna tillinneqarsimavoq.

Politiit tallimat eqqartuussivimmi suliamut malinnaapput.

Suliaq ilungersunartoq

Suliaq ilungersunartorujussuusoq unnerluussisussaatitaasoq saqqummiussinermini oqarpoq.

- Taamatut aallaasersortoqarneranik suliaq qaqutigoortuuvoq. Tamannalu Narsami pivoq. Tamanna najukkami innuttaasunut toqqissisimajunnaartitsingaatsiarsimasoq qularutissaanngilaq. Tamannalu ulluni tulliuttuni misissussavarput. Soorunami aamma suliap maani Aarhusimi suliarineqarnera qaqutigoortuuvoq, kisianni teknikkikkuinnaq pivoq, tassami Kujataani eqqartuussivik suliamik ingerlatsisuummat, Martin Strandby Nielsen oqarpoq.

Unnerluutigineqartoq aallaaniaannarani "toqutsiniarlunili eqqarsimasoq" erseqqissaavoq.

Taamaattumik illu qulimiguulillu marlunnik timmisartortartulik qulingiluanillu ilaasoqartoq aallaaneqarput.

Immikkut unnerluussisup saqqummiussinermini illup qulimiguuliullu aqerlumit putusimanerisa assingi takutippai. Kingusinnerusukkut Narsami ilisimannittutut nalunaajaasut videokkut attaveqaatitigut suliami sassartinneqassapput.