Vivian Motzfeldt (S): Sumiiffissinni suliassasi aallussigit
Siumup siulittaasuata tullia, Vivian Motzfeldt erseqqissaavoq partiimit aninermi naammaginngisat pillugit aatsaat saqqummiussuisoqartarnera kusanartutut isiginngikkini- Partiitsinnut suleqataarusuttut tikilluaqqusaajuaannarput. Tamattali kiffaanngissuseqarpugut, taamaammat partiimut allamut nuuttut taamaaliorniarunik taamaaliorlik, taanna Siumup nittartagaani allappoq.
Taannaannanngilarli, aamma pingaartumik Siumut Nuuk sakkortuumik kaammattorpaa suliassaminik suliaqaqqullugu, partiip immikkooortortaqarfia taanna piffissami sivitsortumi partiip nuna tamakkerlugu politikkikkut ingerlatsinera annertuumik isornartorsioqattaarpaa, allaallu nammineq partii avaqqullugu sinnernerarluguli imminut kiffaanngissuseqartinnissaminut tunuarsimannginnini ersersinnikuullugu (Energy Transition Mineralsimik ataatsimeeqatiginnissimaneq) piffissamilu kingullermi aalisarnermut inatsisissatut siunnersuut pillugu annikigisassaanngitsumik isornartorsiuinera matumani innersuussutigigunarlugit.
- Immikkoortortaqarfiit tamarmik, minnerunngitsumik Nuuk, kaammattorusuppakka sumiiffimmi politikikkut suliassat suliareqqullugit. Immikkoortortaqarfik siuttuuffigisaq politikikkut tamanik inissaqartitsilluni isummanik pikialaartitsivioqqullugu, tamannami tamatta pisariaqarteqaarput.
"Ajorsarnerluttutut pissusilersorneq arlaannatsinnut iluaqutaanavianngilaq"
Partiip kattuffiani siulittaasup tulliata innersuussutigaa 2023-mi aasaanerani siulittaasussamik toqqaasoqareernera. Taamatuttaaq innersuussutigaa partii ullut tamaasa sulisoq ataatsimeersuarnermi anguniagassatut siunniussat naammassiniarlugit:
- Aasaq ataatsimeersuarnermi siuttussatsinnik toqqaareerpugut. Ataatsimeersuarnermi siunnerfiliussaasut aallaavigalugit timitalersuillutalu sulivugut, suliat ingerlasut inuiaqatigiinnut iluaqutaasussat nukillaarsarneqassanngillat ajorsarnerlunnermit, taamak pissuseqarneq ineriartuutaanngisaannarpoq, Vivian Motzfeldt tikkuaavoq.
Taassuma innersuussutigaa demokratii naapertorlugu ingerlatsinermi amerlanerussuteqartut najoqqutassiisarnerannik aallaavilimmi oqaloqatigiinneq aqqutigalugu naaperiaasinnaaneq pingaaruteqartuusoq, demokratiillu tunngavii piginnaaneqarfigineqanngiooat demokratii nunatsinni inissinnerlussasoq tikkuaalluni.
"Naaperiaasinnaanitta maanaannaq qinersinissaq pinngitsoortippaa"
Vivian Motzfeldt allakkamini ilanngullugu apeqqusiivoq oqaloqatigiinnerit aqqutigalugit naaperiaasinnaassuseqarneq piginnaassaqarfigisimanngikkaanni nunatsinnut tamanna qanoq kinguneqarsimassagaluarnersoq pillugu. Taassuma naliliinera naapertorlugu partii siuttuusoq allamik periarfissaqarsimanavianngikkaluarpoq qinerseqqammernerup kinguninngua maanaannaq qinersisariaqalersinnaaneq killiffigineqangajassimavoq.
- Attassisinnaassuseqarneq aatsaat taamak pisariaqartigilerpoq. Nunatsinni inuuniarnikkut unammillikkagut nunarsuarmi pisunit annertoorujussuarmik sunnerneqarput, ullut tamaasa sulivugut inuiaqatigiittut nukittunerusumik inissisimanissarput tunaartaralugu. Nunarsuarmi pisut siammasissumik suleqatigiinnermik pisariaqartitsiffiupput, aatsaat ikioqatigiikkutta innarleruminassuseq annikillisissavarput, aatsaat taamaaliorutta kiffaanngissuseq anginerusoq pilersissavarput, Motzfeldt tikkuaavoq.
Politikkikkut partiip siulittaasuata tulliata, Vivian Motzfeldtip allagaa tamakkerlugu takuneqarsinnaavoq partiip nittartagaani.