Saarulliit: 2023-mi sunngiffimmi aalisarnissamut akuersissutit aatsaat taama amerlatigisut tunniunneqarput
2023-mi akuersissutit 778-it tunniunneqarput. Akuersissutinit 482-it atorneqartut nassuiaatip takutippaa.
Akuersissutit 2023-mi tunniunneqartut aatsaat taama amerlatigipput, sunngiffimmi saarullinniartut aatsaat taama amerlatigisut akuersissummik tunineqarmata, akuersissummillu atuisut aamma taama amerlatigimmata.
Aalisarnermut piniarnermullu naalakkersuisoqarfimmit nalunaarusiami saqqummiunneqartumi taama inerniliisoqarpoq.
- Nassuiaat inerniliivoq, sunngiffimmi saarullinniartarneq aningaasarsiutaalluartutut aalisarnertut ineriartortorujussuusoq, sunngiffimmi saarullinniartut ilaat inuussutissarsiutigalugu aalisartut ilaannit aningaasarsiaqarnerusarlutik.
2023-mi akuersissutit 778-it tunniunneqarput, taakku 2022-mi tunniunneqartunut sanilliullugit 296-inik amerlanerupput. Akuersissutinit 778-iusunit tunniunneqartunit 482-it atorneqarput, tamatuma takutippaa tunniunneqartunit 62 procentit akuersissut atorlugu aalisartut.
Bundgarninut aningaasaliinerit
- Sunngiffimmi saarullinniartut ilaat bundgarnersorlutik aalisalersimapput, tamanna inuussutissarsiutitut aalisarnermut atortunik peqarnertut isigineqassaaq, bundgarnit 50.000 koruunit missaannik akeqarlutik, nassuiaammi allassimavoq.
Nuummi amerlanerpaat tunitsivinnut tunisipput, pisassiissutinit 40 procentit tunitsivinnut tunineqarlutik. Maniitsumi tunitsivinnut tunisisut amerlanerpaat tulliupput, pisassiissutinit 7 procentit tunineqarlutik. Suliffissaaleqineq pissutigalugu sunngiffimmi saarullinniarsinnaaneq aallartinneqarpoq. 2016-imit 2021-mut suliffissaaleqisut ikileriarput, affangajaannik ikilillutik. 2016-imi 6,3 procentiusut 2021-mi 3,7 procentiullutik, naalakkersuisoqarfik ilisimatitsivoq.