Naalakkersuisut: Aqqusinerni angallannermi inatsimmik nutaamik suliaqartoqarpoq
Illoqarfiit nunaqarfiillu avataanni aqqusinniornissamut aqqusinernut inatsimmik, akisussaaffimmik taassuminnga aalajangersaaviusussamik, Naalakkersuisut suliaqaleruttorput. Tamanna Tasiilap Tiilerilaallu akornanni ATV-nut aqqusinniortoqarnissaanik kissaateqarnermut tunngassuteqarpoq.
Illoqarfiit nunaqarfiillu iluanni aqqusinniornissamut akisussaaffik kommuninit akisussaaffigineqarpoq, illoqarfiit nunaqarfiillu avataanni aqqusinniornissamut akisussaaffiit paasinarsisinneqarsimanani.
Tamanna Attaveqaqatigiinnermut Naalakkersuisup Hans Peter Poulsenip paragraf 37 naapertorlugu Naleqqamiittumut Knud Mathiassenip apeqqutaanut akissutaani atuarneqarsinnaavoq.
Tasiilap nunaqarfiullu 40 kilometerinik avannarpasinnerusumiittup Tiilerilaap akornanni ATV-nut aqqusinermik pilersitsinissamik Naalakkersuisut pilersaaruteqarnersut Naleqqami politikerip paaserusuppaa.
Sumiiffimmi tassani ATV-nut aqqusinissamik Naalakkersuisut pilersaaruteqanngitsut Hans Peter Poulsenip naqissuserpaa, aqqusinermullu inatsit suliarineqartinnagu Naalakkersuisut aqqusinniorsinnaanngitsut innersuussutigalugu.
Akisussaaffik paasinarsisinneqaqqaassaaq
- Akisussaaffik taanna paasinarsisinneqaqqaartinnagu aammalu Namminersorlutik Oqartussat aqqusinniornissamut aningaasanik pingaarnertigut pingaarnersiueqqaarsimatinnagit, aqqusinniornernik Naalakkersuisut suliaqarsinnaanngillat.
"Sumiiffimmi misissueqqaarnermik suliaqartoqaqqaartinnagu" aqqusinniornissamut aningaasartuutissat nalilersorneqarsinnaanngitsut, Knud Mathiassenimut paasissutissiissutigaa.
- Taamaattoq oqaatigisinnaavara Tiilerilaaq qeqertami allami, Tasiilap inissisimaffianiit allaanerusumi, inissisimammat. Tasiilap aamma Tiilerilaap akornanni ATV-nut aqqusinniornissaq suliassarujussuusoq tamatuma takutippaa, Atortulersuutinut Naalakkersuisoq oqarpoq.
Tiilerilaaq nunaqarfiuvoq 90-it missaanniittunik inoqartoq.