Naalakkersuisut: Allaaserisaq eqqunngilaq
Sermitsiaq.AG-p allaaserisaa Naalakkersuisut eqqunngitsuunerarpaat, tamannalu tunuliaqutaralugu piginnittuunermut politikki pillugu politikkikkut isumaqatigiissummut tunngasunik erseqqissaateqarput.
Demokraatit siulittaasuata Jens-Frederik Nielsenip qanittukkut piginnittuunermut politikki nutaaq pillugu suliaq „quiasaarutitut“ taammagu Naalakkersuisut nuannarigunanngilaat.
Aamma atuaruk: Demokraatit: Piginnittuunermut politikki nutaaq quiasaarutaavoq
Tassunga atatillugu Namminersorlutik Oqartussat nittartagaanni tusagassiutinut nalunaarummik Naalakkersuisut saqqummersitsipput, tassanilu ilaatigut allassimasoqarpoq:
“Piginnittuuneq pillugu politikki ulloq 28. marts 2023-mi atsiorneqarpoq, naallu tusagassiortoq allakkaluartoq ukiut pingasut ingerlasimasut aamma piginnittuuneq pillugu politikki suli piareersimanngitsoq.”
Naalakkersuisut tusagassiuutinut nalunaarutaat tamaat atuaruk
Najoqqutassiat amigaataapput
Tamanna Namminersorlutik Oqartussat nittartakkaminni paasissutissiissutigisaannit allaanerulluinnarpoq:
“Isumaqatigiissut 28. marts 2023-mi atsiorneqarpoq, ingerlatseqatigiiffinnillu aqutsilluarnermut Naalakkersuisut najoqqutassiaasa nutarterneqarnerannut tunngaviliissaaq. Nutarterinninnerup naammassinissaata tungaanut piginneqataassutsimik politikki ingerlatseqatigiiffinnik aqutsilluarnermut najoqqutassianit maannamut atuuttunit malinnaaffigineqassaaq.”
Taamaattumik politikkikkut isumaqatigiissuteqartoqarneranit ukiup ataatsip qaangiutilernerani Namminersorlutik Oqartussat ingerlatseqatigiiffiutaannut najoqqutassat suli piulersimanngillat, taamaattumillu Demokraatit siulittaasuata suliaq „quiasaarutitut“ taavaa.
Taamaattumik piginnittuunermut politikkimut najoqqutassiat maanna atuuttut suli nutaanngitsuupput, 2012-imi allanneqarsimasut.
Najoqqutassiat atuuttut 2012-imeersut atuakkit
ESG suua?
ESG-mik aqutsineq suliffeqarfinni atugaaneruleriartorpoq, tassaavorlu piujuartitsineq atorlugu suliffimmik ilusilersuineq. ESG naalisagaavoq isumaqartoq Avatangiisit, Inuiaqatigiinnut tunngasut Aqutsinerlu, taakkunanilu avatangiisit, silap pissusia, inuiaqatigiinnut tunngasut suliffeqarfiillu pissusilersuutaat pineqarput.
Januaarip 31-ani februaarillu aallaqqaataani Nuummi Hotel Hans Egedemi ukiumoortumik siulersuisunut isumasioqatigiisitsineq ingerlanneqarmat, sammisap oqaluuserisassanut ilaasimannginnera najoqqutassiat suli inissinneqarsimannginnerannik aamma takussutissaavoq. Tassani Namminersorlutik Oqartussat ingerlatseqatigiiffiutaanni pisortat siulersuisunullu ilaasortat 90-it missaanniittut peqataapput. Taarsiullugu ESG aamma suliffeqarfiit Namminersorlutik Oqartussanit pigineqartut inuiaqatigiinni qanoq inissisimaffeqarnerat sammineqarput.
Akissutiserusunneq
2024-mi januaarip tallimaani Sermitsiaq.AG-p apeqqutit imaattut Naalakkersuisunut nassiuppai:
Piginnittuuneq pillugu politikki
Decembarip aallartinnerani Mute oqarpoq inaarutaasumik allakkiaq (piginnittuuneq pillugu naleqqutassiat, aaqq.) naammassingajalersoq, isumaqatigiinniartullu akuersinissaat kisimi amigaataasoq.
Qanoq ingerlava?
Qaqugu piariissava?
Nassiussinnaavisiuk?
Siulersuisut ataatsimiinneranni sammineqartussaq piffissaq eqqorlugu sammineqarsinnaava, imaluunniit kinguartinneqarpa?
Piginnittuuneq pillugu politikki iluanaarutinullu politikki/aningaasanut inatsit
Piginnittuuneq pillugu politikkimut tunngatillugu 2024-mut Aningaasanut Inatsimmi aalajangerneqarpoq Namminersorlutik Oqartussat suliffeqarfiutaat qanoq iluanaarutissarsiffigineqarsinnaanersut allattugaataajunnaassasut:
Sooq taamaappa?
Tamannalu erseqqissumik paasissutissiinermut, piginnittuunermut politikkimut tamarmut tunngaviusumut, akerliunnginnerpa?
Suliffeqarfiit aningaasanik qanoq amerlatigisunik tunniussinissaanut naatsorsuutit sooq innuttaasunit takuneqarsinnaajunnaassappat?
Qaammatit marluk qaangiutereersut Sermitsiaq.AG apeqqutinut akissutisisimanngilaq.
Kingumut siumullu
Naalakkersuisut ersarissaaneranni aamma allassimavoq:
""Suliassat pillugit tabeli" Aningaasanut inatsimmit peerneqarsimammat eqqorpoq, kisiannili piginneqatigiiffinni iluanaarutissatut anguniakkat, aningaasaatit aaqqissuunneqarnerat aamma iluanaarutinit agguagassarsiat pillugit politikki nalunaarusiami ersarinnerujussuarmik nassuiaammik peqarpoq, taanna Naalakkersuisut nittartagaanni tamanut saqqummiunneqarsimalluni, saqqummiussissut uani takuuk: Inatsisartunut ukiumoortumik nassuiaat 2023"
Ukiumi tulliuttumi aningaasanut inatsimmi qanoq annertutigisut iluanaarutissatut naatsorsuutigineqarsinnaanersut, suliassat pillugit tabelimi ukiorpassuarni innuttaasut takusinnaanikuuaat.
Tamannali 2024-mut Aningaasanut Inatsimmi peerneqarpoq, taamaattumillu ingerlatseqatigiiffiit namminersorlutik oqartussanit pigineqartut ataasiakkaat Nunatta Karsianut qanoq iluanaarutinik akiliinissaat naatsorsuutigineqarnersoq innuttaasut ilisimasinnaajunnaarpaat.
Naalakkersuisut tusagassiuutinut nalunaarutaanni nassuiaatigineqanngilaq sooq kingumut isigisumik nassuiaammut innersuussinersut, tassami suliassat pillugit tabeli siunissamut isigisumik iluanaarutinut piumasaqaatit pingaarnerutinneqarmata.