Naalagaaffinngornissaq pillugu innuttaasunik taasititsisoqarnissaanik Atassut piumasaqarpoq
Unittoorfimmit partiip oqaatigisaanit ingerlariaqqittariaqarpugut, apeqqullu innuttaasunut toqqaannartumik inissinneqartariaqartoq, Atassut isumaqarpoq.
Naalagaaffinngussaagut imaluunniit naamik?
Innuttaasut tamanna akissavaat, Atassummi siulittaasoq, Aqqalu C. Jerimiassen taama isumaqarpoq:
- Isumaqarpugut ingerlariaqqittariaqalersugut toqqaannartumillu inunnut naliliiffigitillugu. Innuttaasut taasitittariaqalerpagut naalagaaffinngornissaq pillugu, taamaalilluta oqallinnerujussuaq inernilersinnaalissagatsigu.
- Namminiilivinniarneq naalagaaffinngorniarnerlu. Allaanngiivippoq allamik politikkikkut eqqartugassaqanngitsugut. Ukiuni qulikkaani tallimani uteqattaarinerujussuit, namminiilivinniarneq oqarluartaarutaaginnaleqqasoq unittoorfigeqqavarput. Innuttaasut akornanni avissaartuussutaaginnalersimasoq, allanullu politikkikkut suliassarpassuarnut eqqartugassarpassuugaluartunut ingiaaginnalersimavoq, Aqqalu C. Jerimiassen oqarpoq.
Inatsisartunut qinersinermut atatillugu innuttaasunik taasititsineq
Inatsisartunut qinersisoqalerpat, Aqqalu C. Jerimiassen innuttaasunik taasititserusuppoq, taamaalilluni taasititsineq pisariaqanngitsumik aningaasarpassuarnik akeqassanngimmat.
- Amerlanerussuteqartullu naalagaaffinngornissaq toqqarpassuk, isumaqanngilaq ingerlaannaq Nunarput naalagaaffinngussasoq. Pisortatigoortumilli tunngaviusumik anguniakkatut nunarput qanoq siunnerfeqarnersoq oqaatigisinnaalissavarput, kiisalu naalagaaffinngornissaq pillugu oqallinneq aappimik naamimilluunniit tunngaveqarunnaarluni alloriaatissat tullii oqallisigisinnaalissallutigit.
Aappaagu Inatsisartunut kommuninullu qinersisoqassaaq, ikerinnakkut qinersisoqanngippat.