Lennert Ilisimatusarnermik Siunnersuisoqatigiinni siulittaasunngorpoq

Nunatsinni Ilisimatusarnermik Siunnersuisoqatigiit ilisimatusarnermut aningaasaliisartuupput, aalajangiisartunut ilisimatusarnermullu attuumassutilinnut aamma ilisimatusarnermi politikkunut tunngasunut siunnersuisartuullutik.

Siunnersuisoqatigiinnut ilaasortat nutaat Naalakkersuisut toqqaqqammerpaat, taakku decembarip 31-anni 2026-p tungaanut ilaasortaassapput. Toqqaaneq kalaallit ilisimatusarnikkut suliffeqarfiutaannit, ilisimatusarnikkut qitiusumik sammisaqarfiinit, ilisimatusarnikkut suliaqartunit kiisalu aallarnisaasutut nutaaliornikkullu suliaqartunit inassuteqartitsinikkut pivoq.

Mitdlaraq Lennert meeqqat atuarfiat pillugu siornatigut ph.d.-liorsimasoq aamma Ilisimatusarfimmi adjunktiusimasoq, siulittaasutut toqqarneqarpoq. Lennert namminersortutut siunnersortiullunilu Ilisimatusarfimmi avataaneersutut ilinniartitsisuuvoq.

Periusissiaq piviusunngortissagaat

Kalaallit Nunaanni ilisimatusarnermi periusissiaq siulleq, ukioq ataaseq sinnilaarlugu qaangiuttoq akuerineqartoq piviusunngortitseqataaffigissallugu oqarpoq:

- Naalakkersuisut ilisimatusarnermi periusissiami ilisimatusarnerup silarsuaani politikkikkut takorluukkat siunertallu inissippaat, siunertallu tassaapput siunnersuisoqatigiit piviusunngortitseqataaffigisassaat. Siulittaasutit ilisimatusarnermi ilisimatusarnermilu siunnersuisoqatigiinni sinaakkutit pitsaanerulernissaannut sulinissara qilanaaraara, Mitdlaraq Lennert oqarpoq.

Mitdlarak Lennertip Josephine Nymand, Nunatsinni Ilisimatusarnermik Siunnersuisoqatigiinni ukiuni 2017-2023 siulittaasimasoq taarserpaa.

Naalagaaffinngornissamut Nunanullu allanut Naalakkersuisup Vivian Motzfeldtip siunnersuisoqatigiit nutaat suleqatiginissaannut qilanaarpoq:

Pingaaruteqartut

- Ilisimatusarnermut Siunnersuisoqatigiit 2014-imiilli pingaarutilimmik inissisimanikuupput. Siunnersuisoqatigiinnit tunuartut suleqataasimanerinik qujaffigiutigalugit siunnersuisoqatigiinni ilaasortanngortut nutaat tikilluaqquakka.

- Ilaasortanngortut nutaat suleqatigissallugit qilanaaraara tamatuma saniatigut ilinniarfiit suliffeqarfiillu inassuteqarsimanerinut qujaffigaakka.

Siulittaasoq/ Formand:

• Mitdlarak Evelyn Lennert, siunnersorti namminersortoq Ilisimatusarfimmilu avataaneersutut ilinniartitsisoq

Ilaasortat/ Medlemmer:

• Rasmus Leander Nielsen, Nasiffimmi - Nunanut Allanut Sillimaniarnermullu Ilisimatusarfimmi lektori aqutsisorlu
• Vivi Ane Sofie Noahsen, Nunatta Katersugaasivia Allagaateqarfimmi aqutsisoq
• Kirsty Langley, Asiaq – Greenland Surveymi ilisimatusartoq
• Gert Mulvad, Nunatsinni Peqqinnissaqarfiup ataani nunap immikkoortuani nakorsaq
• Sofie Louise Sandberg Sørensen, DTU Spacemi ilisimatusartuuneq
• Inoqut Kristensen, Nalik Ventures A/S-imi aningaasaliinermut aqutsisoq misissueqqissaartorlu
• Lorenz Meire, Pinngortitaleriffiup Silap Pissusianik Ilisimatusarfiani ilisimatusartuuneq