Issittumi tunngaviusumik ilinniarneq: Suliluunniit ilinniarneq aallartinngitsoq annertusaasoqalerpoq
Illersornissamut ministeri Troels Lund Poulsen aamma Naalagaaffinngornissamut nunanullu allanut Naalakkersuisoq, Vivian Motzfeldt issittumi tunngaviusumik ilinniartitaanerup annertusarneqarnissaanut politikkikkut suliassartaanik aallartitsipput.
Siullermik politikkikkut nipitoqisumik oqallittoqarpoq ilumut ilinniarfimmik nunatsinni taamaattumik aallartitsisoqassanersoq tamatumalu ilutigisaanik aamma oqallisigineqarpoq illersornissamut ilinniarfiussanersoq imaluunniit upalungaarsimanermut ilinniarfiussanersoq.
Qanorluunniit politikkikkut oqallittoqartigisoqarsimagaluarpat, pissutsit piviusut takutippaat inuusuttut ilinniarfimmut taamaattumut, qanorluunniit taaguuteqartinneqaraluarpat, iserniarnissaminnut periarfissamik utaqqiinnarsimasut. Tassami ilinniarnissamut tassunga qinnuteqarsinnaalerneq ammaaneqarniariartoq inuusuttorpassuit ilinniakkamut piukkunnarnerlutik misilitsikkusullutik tulleriaattut imaaginnavipput.
Illersornissaqarfiummi ilinniarnissamut neqeroorusiani inuusuttut kissaataannut eqqorluaavissimavaa, tassa issittumi tunngaviusumik ilinniarfiup imarisassaatigut aammalu tassani ilinniareernerup kingorna ilinniaqqinnissamut periarfissat eqqarsaatigalugit.
Ilinniartitaaneq atserneqarsimavoq Issittumi Tunngaviusumik Ilinniarfik. Politikkikkummi oqallinnersuaq qatsuumimmat, illersornissaqarfiup aaqqissuussineratigut sakkutuutut piukkunnarsarneq upalungaarsimanermilu suliassanik aallussisinaalerneq akuleriisillugit ilinniarfik ilusilerneqarpoq, ilinniakkallu naammassereerneratigut illersornissaqarfimmut qinnuteqartoqarsinnaassaaq, soorlu tunngaviusumik ilinniarfiit allat assigalugit.
Illersornissamut ministeri neriorsuivoq
- Neriorsuivunga, isumaqarama Issittumi tunngaviusumik ilinniarfimmut isersinnaasut amerlineqarnissaat sulissutigissagipput. Maannakkut ataatsikkut aallartissinnaasut 22-nut inissinneqarnikuupput. Taamaattorli qinnuteqartorpassuusimapput, taamaammat Vivianimut (Motzfeldt, aaqq.) oqarpunga, imminut pisussaaffilerusullunga sulissutigissallugu siunissami inuusuttut amerlanerusut aallartissinnaasalissasut, taamaaliornikkut qulakkeerneqassammat inuusuttut iserusuttut ukioq ataaseq marlulluunniit utaqqisitaasannginnissaat, Troels Lund Poulsen oqarpoq.
Illersornissamut ministeri taamak neriorsuuteqarnermini innersuussutigaa ilinnialernissamut pilerisaarilluni angalasimaneq, siorna ukiakkut Kalaallit Nunaanni illoqarfinni assigiinngitsuni ingerlanneqarmat inuusuttorpassuarnit ornigarluarneqarsimasoq, tassanilu ilinnialernissamut piukkunnassuseqarneq ilanngullugu misilitsinnissamut periarfissaqartitsinikuulluni.
Taamaakkaluartoq maannangaaq illersornissamut ministeri qanoq amerlatigisut tiguneqartalernissaannik kisitsisinngorlugit allilerinissaq pillugu oqaaseqarsinnaanngikkallarpoq, taamaattorli:
- Maanna paasereerparput ilinniakkamik aallartitsinissamut inissat 22-it naammanngitsut, taamaammat suliaq aallartittariaqarparput aappaagu majimi aallartittussat amerlanerunissaat pillugu, taamanikkornissaanummi ilinniaqatigiit aappassaat aallartittussaapput, illersornissamut ministeri tusagassiorfimmut Sermitsiaq.AG-mut oqarpoq.