Inunnik isumaginninnermi siunnersortit akerliussutsimik takutitsinissamut aggersaapput

Nunami maani illoqarfinni arfinilinni inunnik isumaginninnermi siunnersortit pingasunngorpat akerliussutsimik takutitsiumaartut, Isumaginninnermi siunnersortit kattuffiat NIISIP nalunaarpoq.

Kattuffiup ilaasortami tapiissummik annaasaqarnissaat naammaginngilaat, tamannalu akerliussutsimik takutitsinermi takutinniarlugu:

- Pisortat Atorfillillu Kattuffiata akornanni isumaqatigiinniarnerinut naammaginninnginnermik takutitsiniarluta NIISIP / Inunnik isumaginninnermi siunnersortit kattuffiat akerliussutsimik takutitsissaaq.

Sumiiffinni arlalinni akerliussutsimik takutitsisoqassasoq

Ilulissani, Aasianni, Sisimiuni, Maniitsumi, Nuummi Qaqortumilu pingasunngorpat nalunaaqutaq 13.00 akerliussutsimik takutitsisoqassaaq. Illoqarfinni allani aamma akerliussutsimik takutitsisoqarsinnaasoq kattuffik ilisimatitsivoq.

- Akuersaanngilluinnarparput myndighedstillægip peerniarneqarnera, kiisalu rådighedstillæginik taarserneqarniarnera, tassanilu qaangiuttoornermi sulisussaatitaaneq qaammatini pingasuni 52 time tikillugu piumasaqaataanera, inunnik isumaginninnermik siunnersortit kattuffiat tusagassiuutinut nalunaarummi allappoq.

Kattuffik naapertorlugu tapiissutit atorunnaarsinneqarpata isumaginninnermi siunnersortit qaammammut 3.500 koruunit angullugit annaasinnaavaat.

- Tamatuma saniatigut NIISIP-ip erseqqissarniarpaa immikkut ikiorserneqarnissaminnik pisariaqartitsisut atugaat ajorsiartuinnarnerisa malunnarsigaluttuinnarnera naammaginngilluinnarlutigu.

AK Namminersorlutillu Oqartussat suliaq pillugu oqaaseqartinniarlugit Sermitsiaq.AG sulissuteqarpoq.