Innuttaasut apeqquseraat: Sooruna atlantikoq qulaallugu timmisartuussinermi akit assigiinngilluinnartut?
Sisimiuni innuttaasut Københavnimut angalanissamut akit appartussaanerat nuannaarutigaat, paasisinnaanngilaalli sooq illoqarfimmi allameersut akiliinerusariaqarnersut
Timmisartoqarfissaq nutaaq novembarip 28-ani ammarneqarpat Nuummiunut Sisimiormiunullu Københavnimut timmisartumut billetsit akikinnerulissapput.
Københavnimut timmisartorniarunik 820 koruuninik akikinnerulissammat, Sisimiormiut nuannarutigaat. Taamaakkaluartoq Aasiammiunut, Iluliarmiunut Kangerlussuarmiunullu billetsit akisunerulissapput. Billetsit akii nikinganerat innuttaasut apeqquserpaat. Apeqqusiisunut ilaasoq niviarsiaraq 15-inik ukiulik:
- Apeqqusernarput sooq illoqarfiit anginerit akikillisaavigineqarnersut ilaalu illoqarfiit minnerit akitsuiffigineqarlutik, 15-inik ukiulik Malu Olsen Berthelsen Sermitsiaq.AG-mut oqarpoq.
Taassuma nuannaarutigaa Sisimiunit Københavnimut billetsit akikillissammata, kisianni paasiuminaatsillugu sooq illoqarfimmi allameersut Atlantikoq qulaallugu angalaniarunik akiliinerusariaqarnersut.
Tamarmik naligiimmik periarfissaqassapput
Ilulissani innuttaasut Københavnimut angalaniarunik 2.080 koruuninik akiliinerussapput. Nuummiillu Københavimukarniarunik 3.800 koruuninik akikillisaavigineqassallutik. Tamanna naligiinnginnerujussuusoq sisimiormiu Gerth Hans Berthelsen isumaqarpoq:
- Ajorinngilara sisimiunut taamatut akikillisaaffigineqaalaarsimagatta, kisianni isumaqarpunga sineriammiut aamma allaminngaanneersut aamma taamatut pineqartariaqaraluartut. Nunap inuit assigiimmik pineqartariaqaraluarput, assigiinngissitsineq angivallaalerarluarpoq.
Dorthe Pisiffimmut isilersoq Sermitsiaq.AG-miit aamma aperineqarpoq. Aperineqarnermini kisitsisit takutinneqartut qimerloorluarpai.
- Nikingasorujussuupput malunnartumik. Nikingasorujussuit takusinnaavakka. Apeqquserpakka. Isumaga malillugu naligiinniartussaassagaluarput, Dorthe Reimer Kristiansen Sermitsiaq.AG-mut oqarpoq.