Ingerlaaqatigiinneq: Spiralilersuinermi eqqugaasimasunut arnat tapersersuillutik ersersitsipput
Arnat Nuummi ullumi nalunaaqutaq 13:00 ingerlaaqatigiipput ersarissumik oqariartuuteqarlutik. Arnap timaa arnap nammineq timeraa, arnallu spiralilersissanerluni spiralilersissannginnerluniluunniit nammineq aalajangertussaavoq.
- Nakorsap timerinngilaa. Naalagaaffeqatigiiffiup timerinngilaa. Uangaana timera, uangalu kisima aalajangigassaraara timera qanoq iliorfigineqassanersoq.
Ilaatigut taamak allagartarsuit ilaanni allassimasoqarpoq tallimanngornermi arnat ulluanni ingerlaaqatigiittoqarmat.
8. marts tassaavoq arnat tamaviaarutiminnik nittarsaaffiat, ullorlu nalliummat arnat arlalissuit Nuummi katersortarfiup eqqaani naaperiarlutik ingerlaaqatigiipput.
Arnat ingerlaaqatigiinnerminni oqariartuutaat paatsuugassaanngilaq ersarillunilu. Arnap timini suneqasssanersoq pillugu nammineerluni kisimi aalajangiisussaavoq. Allat aalajangiisussaanngillat.
Ingerlaaqatigiittut tassaapput arnat namminneerlutik timiminnik spiralilersuinermit eqqugaasimasut aammalu arnat eqqugaasimasunut misiginneqataallutik tapersersuillutillu ersersitsisut. Allaaserisap qulaatungaani assilisat qimerloorsinnaavatit.