ICC: Arnat spiralilersuisimanermut eqqugaasut tamaasa tapersersorpagut

Arnanik timikkut namminneq aalajangiisinnaatitaanermut inuttullu naleqassuseq pillugu pisinnaatitaaffeqassapput. Kalaallit Nunaanni arnapassuit spiralilersuisimanermut suliani eqqorneqartut pisinnaatitaaffiit taakku ukiuni kingullerni ilungersuutigaat.

ICC arnat ulluannut atatillugu oqaaseqaammini tamanna erseqqissarpaa, arnallu tapersersorlugit oqariartuuteqarluni. ICC-p arnat ulluanni oqaaseqaataa tamakkiisoq, Sermitsiaq.AG-p saqqummersissallugu aalajangerpaa:

"Ukioq manna arnat ulluat immikkut ittuuvoq. Arnanik timikkut namminneq aalajangiisinnaatitaanermut inuttullu naleqassuseq pillugu pisinnaatitaaffinnik illersuisunik tunuliaqutsiinissaq aatsaat taamak pingaaruteqartigivoq.

ICC-p arnat spiralilersugaasimaneq pillugu sorsuutiginnittut eqqugaasullu saqqummertut tamakkiisumik tapersersorpai. Taakku inuttut ataasiakkaarlutik eqqugaapput, ataasiakkaarlutillu sapiissuseqarlutik suliniuteqarput. Arnat sapiissuseqarlutik iliuuseqarnerat inuiaqatigiinnut tamanut, inuiattullu pisinnaatitaaffinnut ataatsimoorlutalu oqaluttuarisaanitsinnut pingaaruteqarpoq. ICC aamma arnanut avammut saqqummersimanngitsunut eqqunngitsuliorfigineqarsimasut aamma misigisimasunut tapersersuivoq, eqqugaasimasisunummi ilaammata.

Kiisami Inuit pisinnaatitaaffiinut tunngasut sammineqalerput

Naalakkersuisut ICC-mit kaammattuutigisimasatsitut spiralilersuisimanermut suliami inuit pisinnaatitaaffiinut tunngasunik misissuinissamik aallartitsinerannut, tusarliussaq nuannaarutigaarput. Maannamut qularutiginagu ilisimavarput, inuit pisinnaatitaaffiinik unioqqutitsinerit annertuut pineqarmata.

Danskit naalakkersuisuisa inuit pisinnaatitaaffiinut tunngasut aamma sammineqartariaqarnerannik nassuerutiginninnginnerat tupigusuutigaarput. Folketingimut akissuteqaammi danskit peqqissutsimut ministeriat inuit pisinnaatitaaffiinut tunngasunik misissuinissamik itigartitsivoq, misissuinerup “sumulluunniit attuumassuteqanngitsumik suliamut tunngatillugu ilisimasaqassutsikkut ingerlanneqarnissaanik inuit pisinnaatitaaffiinik unioqqutitsinerusinnaaneranik nalilersuinermit avissaartuunneqarnissaa” patsisigalugu. Inuit pisinnaatitaaffii aamma inatseqarnermut suliamullu tunngasunut ilisimaqassutsimut tunngassuteqarput. Unioqqutitsisoqarsimaneranik erseqqissuliunnginneq tassani eqquinerlulluinnartutut isigaarput.

Arnat pisinnaatitaaffii aamma ataatsimoorussatut inuit pisinnaatitaaffiinut tunngasuupput

Ullumikkut inuiaqatigiinni oqaluttuarisaanikkut pingaarutilimmik killiffeqarpugut, arnanullu pisinnaatitaaffiinik illersuijuarnissap pingaaruteqassusaa aatsaat taamak ersaritsigaaq. Taamaattumik tamanut kaammattuutigaarput spiralilersuinermik suliamit eqqugaasunut ataatsimoorluni tapersersuinissamut. Spiralilersuisimanermut tunngasoq aammalu naartusinnaajunnaartsisarnermut allanut tunngasut, naapertuilluarnermik arnallu pisinnaatitaaffiinik sorsuutiginninnermik ingerlatsiuarnissamik ersersitsisuupput. Naligiissitaanermut sorsuutiginninnerit arnat pisinnaatitaaffiinik sorsuutiginnittariaarunnertut imaluunniit pingaarnerusutut sorsuutigisassatut paatsoorutaanatillu isumaqarfigineqalinnginnissaat ersersikkumavarput.

Arnanik naartusinnaajunnaarsitsineq unioqqutitsineruvoq annertooq. Inuiaqatigiinni arnat taamak amerlatigisut naartusinnaajunnaarsinneqarnerat ataatsimoorussamik inuit pisinnaatitaaffiinik unioqqutitsineruvoq, aammalu inuit pisinnaatitaaffiinut tunngasunik nalunaarusiamut ilanngutsinneqarnerani, nunani tamalaani inatsisinik unioqqutitsinerunersoq ilanngullugu nalilersorneqartariaqartoq ICC-p inassuteqaatigaa.

Spiralilersuisimanernik eqqugaasunit 143-nit naalagaaffiup unnerluutigineqarnerani suliamik pingasoqiusamik ingerlatsisoqalerpoq. Siullertut assigiinngitsutigut misissuisoqarpoq, aappassaanik naalagaaffik unnerluutigineqarpoq, pingajuattullu ICC allallu nunat tamalaat inuit pisinnaatitaaffiinik unioqqutitsinerit pillugit Naalagaaffiit Peqatigiinnut nalunaaruteqartarput, tamatumani siunertaralugu nunarsuaq tamakkerlugu inuit pisinnaatitaaffiinik illersuinissamut suliniutit aqqutigalugit sammineqarnissaat qulakkeerniarneqassasoq. Spiralilersuisimanerimmi arnanut timiminnik piginnittussaatitaanermut, aammalu inooqatigiinnikkut naleqassutsimik inuunermut pisinnaatitaaffeqarnissamut sorsuutiginninnissamut ersarissumik eqqaasitsissutigaat. Suliatut ingerlatani kingulliugallartuni ICC Naalagaaffiit Peqatigiit ammip qalipaataa tunngavigalugu immikkoortitsineq pillugu ataatsimiititaliaanit nunarsuup immikkoortuini tusarniaanermi spiralilersuisimanerit pillugit nalunaarpoq, tamatumanilu peqqinnissamut pisinnaatitaaffimmut naligiinngisitsnerup millisarneqarnissaanut inassuteqaatit suliarineqarput.

Kisimiinngilagut

ICC Naalakkersuisunut, Naalagaaffiit Peqatigiinnut allanullu inassuteqaatinik apuussisarnini nangissavaa. Ajoraluartumik inuiaat uagut kisitta arnanut naartusinnaajunnaarsitsisarnermik iliuutsinik nunasiaataanerup nalaanitut ittunik eqqorneqanngilagut, tamannalu nunat inoqqaavisa pisinnaatitaaffiisa sammineranni tunngaviulluinnartut ilagaat. Erseqqissaatigiumavarput kisimiinnginnatta, neriuppugullu Kalaallit Nunaanni arnat allallu eqqugaasut, nunarsuarmi allani arnat inuillu nunat inoqqaavineersut allat piffimmi matumani tapersersormatigut, tamatumanngalu nukittorsarneqassasut. Tamanna nunarsuaq tamakkerlugu nunat inoqqaavisa pisinnaatitaaffiinik illersuinermik suliaqarnitsinni malugisaqaarput.

Arnat sassartut tamakkerlugit allallu tamarmik pineqartut tapersersungaarpavut.

Arnat Ulluat nukittuumik atorluarisiuk."