Erik Jensen VM-imut angalanermut akiliiumanngilaq
Aningaasaqarnermut naalakkersuisoq Erik Jensen, akileraartartut akiligaannik Københavnimiit Stavangerimut arnat assammik arsarlutik nunarsuarmi pissartanngorniunneranni Kalaallit Nunaata unammineranut aallarniutaasumut, sooq angalasimanerluni tunngavilersueqqippoq.
- Ukiut 20-t qaangiunneranni assammik arsarluni nunarsuarmi pissartanngorniunnermi peqataaqqinnitsinni, nunatsinnut pisumut pingaarutilimmut tapersiinissaq Naalakkersuisut pingaaruteqartutut isigaat, Erik Jensen Demokraatineersumut Anna Wangenheimimut paragraf 37 naapertorlugu akissummini nassuiaavoq.
Københavnimiit Stavangerimut utimullu angalanermut aningaasartuutit, tassa 8.279 koruunit, landskarsimut utertinnissaat pilersaarutiginngikkaa akissummi aamma takuneqarsinnaavoq.
- Naalakkersuisunut ilaasortat Naalakkersuisutut atuunnerminni aningaasartuuteqarsinnaatitaasut, Aningaasarsiaqartitaaneq pillugu Inatsisartut inatsisaanni § 7-imi allassimavoq. Taamattaaq Naalakkersuisunut ilaasortatut angalanermut aningaasartuutit Nunatta Karsianit matussuserneqartartut, Inatsisartut inatsisaanni § 8-mi allassimavoq, Erik Jensen ilisimatitsivoq nangillunilu:
Naapertuuttoq naleqquttorlu
- Aningaasaqarnermut Akileraartarnermullu Naalakkersuisup sinniisutut inissisimaneq taaneqartut naapertuulluinnartutut, Kalaallit Nunaannullu naleqartutut isigaa.
Erik Jensenip Kalaallit Nunaanni Assammik Arsartartut Kattuffiat (TAAK) Stavangerimi ataatsimeeqatigisimallugu Sermitsiaq.AG-mut ilisimatitsissutigaa. Tamanna tunngavigalugu TAAK-ip siulittaasua Nuummi Stavangerimiunngitsoq naapikkumallugu tulluarnerunnginnersoq, Demokraatit Inatsisartunut ilaasortaatitaat aperivoq. Tamatumunnga Erik Jensen akivoq:
- Aningaasaqarnermut Akileraartarnermullu Naalakkersuisup, ilaatigut Naalakkersuisunut Siulittaasup tulliatut, ilaatigullu Aningaasaqarnermut Akileraartarnermullu Naalakkersuisutut, unammineq ataaseq isiginnaarpaa. TAAK-ip siulittaasua aammalu Aningaasaqarnermut Akileraartarnermullu Naalakkersuisoq ataatsikkut Stavangerimiittussaapput, taamaammallu matumani ataatsimeeqatigiinneq naapertuuppoq.