Arnaq 26-nik ukiulik hashimik 2,4 kilomik eqqusseriaraluarpoq
Arnaq hashimik højtalerimut toqqorlugu nunatsinnut eqqusseriaraluarpoq, taannali ilanngaaserisunit paasineqarpoq ilanngaaserisullu Kalaallit Nunaanni Politiinut nalunaarutiginnipput. Arnaq nassuerpoq ingerlaannarlu pineqaatissinneqarluni qaammatini qulini pineqaatissinneqarsimasunut inissiisarfimmiittussanngortitaalluni.
Arnaq 26-nik ukiulik sisamanngornermi ualikkut hashimik 2,4 kilomik nunatsinnut eqqusseriaraluarpoq, hashi poortoriarlugu højtalerimut nassataminiititaminut toqqorsimallugu eqquteriaraluarpaa. Kalaallit Nunaanni Politiit taamak tusagassiuutitigut nalunaaruteqarput.
Ilanngaaserisut arnaq 26-nik ukiulik Kalaallit Nunaannut hashimik 2,4 kilomik eqqusseriaraluartoq misissuinerminni paasivaat. Hashi nassatamini højtalerip iluanut toqqorlugu eqquteriaraluarpaa.
Ilanngaaserisut ingerlaannarlutik Kalaallit Nunaanni Politiinut pisoq nalunaarutigaat, taakkulu ingerlaannaq mittarfiliarput arnarlu tigusaralugu.
Arnaq Kalaallit Nunaanni Politiinit isertitsivimmut mattuppaat, tassaniitinneqarporlu tallimanngornermi martsip 8-ni ualikkut Nuummi eqqartuussivimmi sassartinneqarnissaata tungaanut. Nassuernermi kingunerisaanik ingerlaannaq pineqaatissinneqarpoq, qaamaatini qulini pineqaatissinneqarsimasunut inissiisarfimmiittussanngortitaalluni.
Eqqartuunneqarnermi kingorna arnaq tigummigallagaajunnaarpoq, kingusinnerusukkullu pineqaatissinneqarnini naapertorlugu pineqaatissinneqarsimasunut inissiisarfimmiittussanngoruni aggersarneqassasoq, tusagassiuutitigut nalunaarummi oqaatigineqarpoq.