Ammasumik siunersiuinissaq: Inatsisinik atortitsinermut ataatsimiititaliap Inatsimmut tunngaviusussamut missingiut pillugu apeqqut akissutissarsiumavaa

Tunngaviusumik inatsisissaq pillugu isumalioqatigiissitap suliaminik naammassinninnerata kingorna, Inatsisartuni inatsisinut ataatsimiititaliaq apeqquterpassuarnut akissutissarsiorpoq.

Sammisat tallimat

Inatsisinut ataatsimiititaliap sammisat tallimat sammivai, ataatsimiititaliap siulittaasua Anders Olsen tusagassiuutinut nalunaarummi allappoq, apeqqutillu ima allattorsimapput:

1. Inatsimmut tunngaviusussamut missingiut pillugu (UKA2023/49 aamma UKA2023/74) aalajangiiffigisassatut siunnersuutit siullermeerneqarnerannut Naalaakkersuisut akissuteqaamminni naliliipput ’Kalaallit Nunaata namminersortup Inatsit Tunngaviusussaatut missiliummik patajaatsumik, sulili naammassineqanngitsumik maanna peqalersugut’. Immikkoortut sorliit Naalakkersuisunit naammassineqanngitsutut immikkut isumaqarfigineqarnersut Naalakkersuisumit itisilerlugit nassuiarneqassasut ataatsimiititaliamit kissaatigineqarpoq.
2. ’Inatsit Tunngaviusussaq pillugu Isumalioqatigiissitap isumaliutissiissutaata paasiuminartunngorlugu allanneqarnera Naalakkersuisut aallartereeraat’ taamatuttaaq Naalakkersuisut allapput. Suliap tamatuma erseqqinnerusumik nassuiaatigineqarnissaa suliallu killiffiata paasissutissiissutigineqarnissaa ataatsimiititaliamit kissaatigineqarput.
3. ’Innuttaasut akuutinneqarnissaat aalajangeeqataanissaallu pingaaruteqartoq’ Naalakkersuisut aamma allapput. Taamatut peqataatitsinissamik suliniut qanoq ingerlanneqassanersoq pillugu Naalakkersuisut pilersaarutaat itisilerlugit nassuiaatigineqassasut ataatsimiititaliamit kissaatigineqarpoq.
4. ’Inatsit Tunngaviusussaq pillugu Isumalioqatigiissitap innuttaasunik naapitsillutik, nunarput tamaat angallavigalugu siunneersuummik saqqummiussinissaat’ Naalakkersuisunit kissaatigineqartorujussuusoq ataatsimiititaliap paasivaa. Soorlu ataatsimiititaliaq isumaliutissiissummini allattoq Inatsit tunngaviusussaq pillugu isumalioqatigiissitami ilaasortat innuttaasunik oqallitsitsinermik ingerlatsissappata tamanna ataatsimiititaliamit eqqarsarnartoqartinneqarpoq isumalioqatigiissitat atorunnaarsinneqareermata. Taamaattumik oqallitsitsilluni ataatsimiisitsinernut Naalakkersuisut pilersaarutaat kikkullu taakkuninnga ingerlatsisuussanersut ataatsimiititaliap paaserusuppaa.
5. Innuttaasunik peqataatitsinissamik suliaqarnissamut innuttaasullu peqatigalugit oqallinnissamut piffissaliussamik paasitinneqarnissani ataatsimiititaliap kissaatigaa.

Paasissutissat

Siunersiuineq marlunngornermi marsip aqqaneq-aappaani nalunaaqutaq 14.00 aamma 15.00 akornanni ingerlanneqassaaq, Inatsisillu Ataatsimiititaliaata aamma Naalagaaffinngornissamut Naalakkersuisup ammasumik siunersiuisitsinerani innuttaasut 15-it peqataasinnaapput. Siunersiuinermi tusarnaarniaraanni inissamik siumoortumik inniminniisoqartariaqartoq, allaffeqarfik allappoq.