Aalisarnermut inatsit: Inatsisissatut siunnersuut tamakkiisoq piffissaq eqqorlugu tunniunneqanngilaq
Siunnersuutinik tunniussiffissaq qaangiutereeralulartoq aalisarnermut inatsisissatut siunnersuut Inatsisartoqarfimmi siulittaasoqarfimmut suli tunniunneqanngilaq. Naalakkersuisut aalajangiusimavaat aalisarnermut inatsisissaq upernaaq manna suliarineqassasoq. Inatsisartoqarfimmi siulittaasoqarfik aalajangiisuusussanngorpoq siunnersuut upernaamut suliarineqassanersoq, ukiamulluunniit kinguartinneqassanersoq.
Nutarterneqarpoq tallimanngorneq 8. marts nal. 16:30: Inatsisartut siulittaasoqarfiata tallimanngornermi ualikkut kingusissukkut Inatsisartut upernaakkut 2024-mi ataatsimiinnissaanni oqaluuserisassat saqqummiuppai.
Aalisarneq pillugu Kalaallit Nunatta inatsisissaatut siunnersuut oqaluuserisassani ilaavoq, taannalu siullermeerneqassaaq sisamanngornermi 11. april 2024. Naalakkersuisut kingusinnerpaamik ulloq 22. marts inatsisissatut siunnersuut taassungalu tunngatillugu nassuiaatit paasissutissallu tamaasa Inatsisartunut tunniuteriissagaat ilanngullugu ilisimatitsissutigineqarpoq.
Inatsisartut upernaakkut ataatsimiinnissaannut oqaluuserisassanik tunniussinissaq kingusinnerpaamik tallimanngorneq 1. martsiuvoq, taamaakkaluartoq maanna sapaatip akunnera ingerlareeraluartoq oqaluuserisassatut akuerineqartut Inatsisartut nittattagaanni suli takuneqarsinnaalinngillat.
Sermitsiaq.AG-mit paasiniaraluarparput oqaluuserisassat, Inatsisartunit aammalu Naalakkersuisunit tunniunneqarsimasut aammalu siulittaasoqarfimmit akuerineqarsimasut qaqugu tamanit takuneqarsinnaalissanersut, tamannali allaaserisap naammassinerani suli akissutissarsinngilarput.
Aalisarnermut inatsisissatut siunnersuut Kielsenip nalunaarutigaa
Upernaakkut ataatsimiinnissami oqaluuserisassat annerpaat ilagaat aalisarnermut inatsisissatut siunnersuut, taanna siunnersuuut Naalakkersuisut piareerniarlugu ulapputigisaannut annerpaanut aamma ilaavoq, tamanna aalajangiusimaneqarpoq kattuffiit aalisarnermik suliaqartut suli sivisunerusumik tusarniaasoqarnissaanik allaallumi siunnersuutip kinguartinneqarsinnaanissaanik piumasaqateqartaraluartut.
Nalinginnaasumik tusarniaanerit sapaatip akunneranik sisamanik sivisussuseqartartut inatsisissaq pineqartoq sapaatip akunnerinik arfineq-pingasunik sivisussuseqartinneqarpoq. Tamatuma malitsigisaanik aalisarnermut naalakkersuisoqarfimmi allaffissornikkut inatsisitigullu teknikkikkut suliarinninnissamik kiisalu tusarniaanermi akissutit kalaallisuinnaq imaluunniit qallunaatuinnaq tunniunneqarsimasut nutserneqarnissaanut sivisunerusumik pisariaqartitsisoqalerneranik kinguneqarsimavoq. Tamatumalu kingunerisaanik Naalakkersuisut inatsisissatut siunnersuummik naammasseriikkamik 1. marts killiliussaq eqqorlugu Inatsisartut Siulittaasoqarfiannut tunniussisinnaajunnaarsimasut.
- Inatsisartut Siulittaasoqarfiannut qinnuteqaatigaarput siunnersuut ullormut oqaluuserisassanut ilanngunneqassasoq, tamatuma ilutigisaanik qinnutigivarput inatsisissatut siunnersuut paasissutissallu tassunga tunngasut kingusinnerusukkut tunniukkumallutigit, aalisarnermut piniarnermullu Naalakkersuisoq, Kim Kielsen Sermitsiaq.AG-mut nassuiaavoq.
Maannalu tassa Inatsisartut Siulittaasoqarfiata aalajangernissaa utaqqisaaleqqavoq, taakkumi nalilerlugulu aalajangertussaammassuk Inatsisartut piffissaqarluartitaallutik inatsisissatut siunnersuut upernaaq manna suliarissallugu angumerisinnaassaneraat.